adidas入球大勝Nike

【明報專訊】究竟係adidas好？抑或係Nike好？其實係各有各好。小琴唔係玩各位。若論業績，唔使講，Nike喺美國上市，剛公布截至5月的上年度業績，勁賺148億港銀，絕對係頂級藍籌卡士，相比另一運動名牌adidas喺德國掛牌，上年度只賺23億港銀。一望業績，自然係Nike勁過adidas。 adidas賺錢唔夠Nike多，連市值都有好大距離，adidas市值（計到噚日）係821億港銀，而Nike係2745億港銀，換句話講，Nike市值係adidas的3.3倍。之不過，世事非鐵板一塊，永不更改。adidas雖則係盈利能力及市值雙輸畀Nike，但喺今屆南非世界盃，直至前日，adidas的波鞋表現就明顯好過Nike。 葡國大數朝鮮 救番Nike? 根據彭博的統計，已打完的賽事中，穿著adidas波鞋的國家隊，好似什麼阿根廷、德國等N隊，共入咗26球，即係按每名球員計，每球員有0.126球。相反穿着Nike波鞋的國家隊，好似巴西同葡萄牙等等，平均每名球員只入咗0.083球。 小琴心想，若非葡萄牙日前7比0大數朝鮮隊，Nike入球率數恐怕仲低，分分鐘仲差過PUMA嘅0.081球。其實Nike主席Charlie Denson早前先公開講﹕「今個夏天在南非，Nike將會為賽事中所有極出色的球員，提供嶄新及最創新的產品，為足球員取得優勢。」可惜的是，至今Nike波鞋的表現，暫時稍稍輸畀adidas。 之不過，小琴都要公道啲，Nike贊助球隊比較多，包括不少弱旅，自然會拖低入球率，而且賽事仲未打完，咁快話adidas贏咗Nike，確係唔夠公道，咁小琴就只好放長雙眼，慢慢睇落去，睇吓Nike可否後來居上，由家陣1比0，扭轉為下半場的2比1反勝。 報料電郵﹕piano@mingpao.com