阿蘇現身星洲金沙

【明報專訊】金沙集團喺新加坡開嘅濱海灣金沙，4月開幕，酒店同賭場已經有唔少人幫襯，但係酒店最大賣點﹕空中花園同邊際池泳，要等到今日先開張。集團請咗全球幾百個記者去新加坡採訪，小琴都有份。集團主席艾德森噚日開記者會，為咗照顧唔同國家嘅傳媒，大會安排咗十幾個翻譯，韓文、日文、泰文、越南文、法文、德文、西班牙文、俄文，金沙嘅國際化程度，同世界盃可謂不遑多讓。 大會又介紹，金沙特意由各國邀請名廚嚟開餐廳，等大家賭得痛快，食得痛快。呢批名廚來自各地，包括法國、地中海、日本，當然唔少得新加坡嘅本地薑，雖然未試到佢哋嘅手勢，但聽落都好吸引。咁啱得咁蹺，小琴喺酒店大堂見到個好熟口面嘅人，原來係香港食家代表「阿蘇」蘇絲黃。小琴問佢係咪嚟參加酒店開幕同試食？阿蘇就話唔係，佢同朋友嚟新加坡玩，先知道酒店搞大型活動。阿蘇經常介紹美食，唔知會唔會試吓呢幾位大廚嘅手勢呢？