國家經貿委「重現」江湖

【明報專訊】噚日小琴睇到一份有關內地舊車報廢補貼嘅文件，入面「國家經貿委」五個字映入眼簾，差啲嚇咗一跳，事關呢個全名叫國家經濟貿易委員會嘅中央機構，早響2003年已經取消咗，唔通中央靜雞雞改制，令呢個部門死而復生？

睇真啲，原來嗰個補貼政策早響2002年就已經由財政部同國家經貿委制定，由於每年都係按舊制調整補貼標準，唔算新政，所以每年公布調整方案，都難免要打番「國家經貿委」呢幾隻字落份文件內容度。


03年已撤銷 工作由商務部接手

講番轉頭，國家經貿委原本係國務院轄下部門，不過2003年10月國務院進行機構改革，決定撤銷外經貿部同國家經貿委，而呢兩個部門嘅工作，就由同年設立嘅商務部接手，所以就算內容有提國家經貿委，但下款必定係財政部同商務部，意指文件都係由呢兩個部門發出。