新聞類別
財經
詳情#
【明報專訊】智能手機愈嚟愈普及，除咗平日喺街度上網、打機同做嘢之外，嚟緊可能仲可以做埋屋企個小管家添。小琴噚日同全球半導體商龍頭之一嘅高通，嘅互聯網總裁Rob Chandhok食飯，佢就介紹咗公司嚟緊會推出嘅All Joyn新科技。
呢種科技用佢地個驍龍（snap dragon）處理器，其實係用點對點，即係俗稱嘅BT技術嚟傳送數據。換句話講，即係可以快好多咁做一啲遙距控制，應用返喺日常生活度，就係你可以用部智能手機或平板電腦，控制間屋入面嘅智能電器。
阿Rob就話，個構思喺兩年前同班同事諗出嚟，之後慢慢發大嚟搞。最初構思係用藍芽去做傳送，但第時有機會用到4G網絡去做，即係話你喺街外面，都可以控制到你屋企嘅電器。
支援4G 遙控電器快過App
可能你會話，唓，家都有類似嘅軟件做到啦，使咩靠佢喎。阿Rob就話，因為用咗佢哋高通出嗰隻驍龍處理器，控制起上嚟零舍快，最正係粒處理器可以支援埋4G，咁就無往而不利。
既然有得見高通嘅高層，小琴梗係唔放過機會，幾大都要八卦下，佢哋知唔知iPhone 5幾時出啦，話晒佢哋都係零件供應商之一。之前已經傳出，佢哋粒可以支援4G嘅處理器有機會裝上iPhone 5度，但係產能唔夠可能會推遲咗出街時間。不過，阿Rob就點都唔肯講少少，剩係講咗句「你知啦，同蘋果做生意唔易㗎」，蘋果果然係惡啲。
email:piano@mingpao.com
留言 (0)
