賭王舊臣悔錯過澳博上市

【明報專訊】阿媽一早就教過小琴，投資股票要秉承「唔熟唔買」原則，小琴一直銘記於心。噚日小琴有幸同澳門飲食業聯合商會會長、佳景集團（0703）董事總經理陳澤武食飯，就「意外」領教咗唔少投資心得。


話說餐飯食到中途，陳生突然接到個電話，佢睇睇隻表，問咗句「咦，原來開市啦？」跟住就大大方方咁對住電話講：「賣澳博啦，17.3至17.4元。」


拒絕了澳博3元多批股

陳生啱啱先講開，自己其實係澳博出身，「幫何鴻燊打工20幾年」，後來創立佳景集團，主要業務就係喺澳門經營餐廳，其中大部分最靚嘅餐廳都分佈喺各大濠賭娛樂場所入面，都可以話係「不離本家」。小琴聽到敏感消息，個人都突然精神不少，把握時機問多啲內情。陳生話，自己喺13蚊買入澳博，家陣升咗不少，算喺套現好時機。佢仲透露，當年澳博上市，公司曾經以3蚊幾嘅價格向佢批股，佢當時冇料到濠賭業前景會咁好，拒絕咗人哋個Offer，家諗返起都覺得虧蝕不少。原來行內人都會有睇漏眼嘅時候，小琴不禁感嘆，股市真喺難以預料。


佳景舊年業績相當唔錯，營業額上升45.4%，純利更加飈升119.8%，去到8961萬元，多得澳門旅遊業興旺發展唔少。陳生話，目前喺葡京、威尼斯人開嘅餐廳生意最好，皆因地方靚、人流多，啲客就算唔賭都會來幫襯。小琴覺得，如果陳生未來開店睇得夠準，就可以補得返之前嘅股票損失啦。


email:piano@mingpao.com