河北老闆招港白領 年薪30萬包住大屋

【明報專訊】中國內地經濟發展舉世矚目，香港作為國際金融中心，兩地合作自然少不免。呢排河北省政府就搞咗個「經貿代表團」來香港交流，小琴噚日走去打聽吓有冇新嘅投資項目，喺會場同一個河北嘅電動車生產商傾開計，先發覺原來內地老闆不單止對香港Banker同埋潛在「戰略伙伴」感興趣，仲好想挖走啲香港人才返去幫手。個董事長話，去河北做白領，年薪可以高過30萬蚊人仔，做夠兩三年，公司仲會安排住房，「內地消費水平低，香港人這麼勤奮，大可以回內地發展、生活得好一點！」


有大會領導話畀小琴知，原來河北團來港交流已經係第23年，初時雙方合作都係以香港人主動投資為主，隨住河北經濟騰飛，多咗好多冀商主動來港拓展業務或者融資，省委書記張慶黎聽日仲會親自去港交所敲開市鑼添。小琴就覺得，既然合作方式愈來愈多元化，之後除咗搞招商會，不妨都安排吓「招聘會」，等啲崇尚香港敬業精神嘅內地老闆同埋嚮往低成本大屋嘅香港人才，可以好好結識一番。