鄭海泉辭太地董事

【明報專訊】近排興辭職，核數師炒客魷魚，或者畀個客炒魷魚都有。舊年提早退休嘅華人大班鄭海泉，噚日亦宣布辭去太古地產（1972）獨立非常務董事一職，太古話前大班係基於個人事務辭任，同董事局冇意見分歧。


太古地產今年初先分拆上市，鄭海泉坐咗一陣就走，令小琴有啲憂慮。擔心嘅唔係太古地產有咩問題（雖然董事「跳船」一向好值得留意），而係鄭海泉幾年前身體曾經抱恙，有段好長時間冇乜公開露面，今次入咗太古地產個董事局冇耐又走，希望同鄭大班健康無關。


仲係中電鷹君等公司董事

不過，小琴老友話上個月喺北京見到鄭海泉出席兩會期間都精神飽滿，叫小琴咪咁多心。好消息係，除咗太古地產，鄭海泉仲係中電（0002）、鷹君（0041）、港鐵（0066）同匯賢產業（87001）嘅獨立非執行董事，而鄭海泉亦無話要辭任，即係佢仲有精力兼任呢幾間公司嘅職務啦。