新股CW多謝創興逼改名

【明報專訊】早前差啲因撞名上唔到市嘅創興集團，噚日終於以CW Group（1322）之名響聯交所掛牌。CW Group主席兼行政總裁黃觀立，喺上市儀式上話自己因禍得福，要「感謝」創興銀行（1111），多虧今次事件，令到傳媒同金融界朋友多啲認識CW，成就一件好事。


首日股價一度升逾一成

新加坡製造業公司CW Group，原定於3月29日以中文名「創興集團」上市，惟臨掛牌前晚因中文名涉嫌商標侵權要押後上市，指控創興集團侵權嘅就係本地老牌上市公司創興銀行。眼見上市計劃泡湯，創興集團不得不做出妥協，棄中文名換用英文名「CW Group Limited 」來保上市不失。


CW主席黃觀立噚日喺上市儀式上被問到重名風波時，神情輕鬆半開玩笑咁講，自己要感謝對方（創興銀行），因為一來延後上市令公司避過前排港股風暴期，二來傳媒同金融界因撞名事件關注到CW呢間細公司，有利CW未來拓展亞洲市場。佢話暫時唔急住起新嘅中文名，因為公司依然可以響香港以外地區使用「創興集團」商標。


大市氛圍轉好，CW Group股價噚日一度升逾一成，收市報1.4元，較認購價1.33元高出5個巴仙，唔計手續費，每手賺140蚊。


不過，都有投資者唔滿意公司今次嘅上市安排，覺得倉卒咗少少，未能廣泛接觸到公眾市場，令到CW嘅公開認購率只得7%，連大股東都要接貨。


email:piano@mingpao.com