印度人買豪宅 要做足3個世紀

【明報專訊】我哋香港寸土呎金，樓價貴到飛起，好似小琴呢啲打工仔，每個月人工都未必夠買個馬桶位。慘係慘啲，但比上不足，比下有餘。話時話，平均每個印度人要做足三個世紀先可以喺孟買（Mumbai）買番層豪宅。以收入計，孟買房價遠遠超過香港，係當仁不讓全球最難以負擔嘅城市。


舉例來講，孟買1000呎豪宅售價889萬元，等於印度人平均年收入嘅308倍。內地大城市樓價同樣貴到離曬譜，上海同等住宅價錢相當於人均年收入嘅233倍，莫斯科係144倍，經濟發達嘅新加坡同埋紐約，分別係43倍同48倍。


詳細啲講，舊年年尾，孟買市中心樓價每呎要8900蚊，人均年收入只得2.9萬元；上海黃金地段每呎1.5萬元，中國人均年收入係6.55萬元。


專家就話，印度、俄羅斯同埋南非係2001年以來表現最佳嘅房產市場，印度樓價至今已經增長2.84倍，日本、愛爾蘭同德國則是樓價倒退最犀利嘅地方，大家投資外國資產都要留意啦。