陸東撐23條立法

【明報專訊】Look's Asset Management創辦人兼投資總監陸東喺業內一向有名氣，不過小琴噚日先知道，原來陸生喺一位全心支持23條嘅愛國港人。佢噚日出席活動之後，唔知傾到咩話題，突然頗激動咁同記者講，「23條（立法）係時間問題，一定要推㗎。」態度咁積極，小琴在場都覺得有小小驚訝。


被問到驚唔驚未來23條立法，陸生當場回應﹕「驚乜嘢？作為一個中國人，呢個喺你對國家嘅責任。」佢仲話，香港人「唔可以吓吓淨係識得攞着數，人民幣又要、自由行又要、CEPA又要，23條就唔要」，搞到小琴都差啲懷疑自己係咪太貪心。咦，咁撐23條，唔通陸生有興趣入政府幫手？


立法係對國家的責任

小琴正想入非非，陸生已經回應話自己冇興趣入政府，話家陣「又唔係冇嘢做」，雖然一路識CY，不過人哋當選之後太唔得閒，都冇機會再見面。


做義工推廣弱能人士陶藝

不過唔講唔覺，陸東原來不嬲都唔係齋專心財經。小琴噚日撞到佢，係喺聖雅各福群會個慈善陶藝展覽上，睇真啲，原來佢仲係大會個「陶藝推廣顧問」，專門幫手搵展覽場地，同埋向本地公司推銷啲弱能人士親手整嘅靚靚藝術品。


講起呢份義務工，陸東仲透露自己20幾年前原來真係學過幾年陶藝，自從09年知道呢個活動之後就年年都有幫手。睇來，陸生真係一位既有政治熱忱，又有社會承擔，並有閒情逸致嘅財經界人士。


email:piano@mingpao.com