俄鋁慶祝港上市兩周年

【明報專訊】小琴噚日啱啱好經過皇后像廣場，見到個場同平日有小小唔同，擺咗好多有鬼佬同埋城堡嘅大幅相片出來展覽：咁得意，梗係要行過去八卦下啦。問吓在場揸咪嘅司儀姐姐，先知道原來係俄鋁（0486）前排喺Facebook發起咗個叫「潮拍俄羅斯」嘅攝影比賽，專門畀一啲去過俄羅斯嘅香港本地市民參加，比賽結果噚日揭曉，頭獎獲得莫斯科雙程飛機票連埋住宿，亞軍季軍都分別有貝加爾湖來回機票同埋2萬蚊百老匯現金券，俄鋁獨立非執行董事梁愛詩仲親自頒獎添。（圖）


出動梁愛詩 親自頒獎

早知有啲咁嘅機會，小琴之前都應該嗌埋朋友去俄羅斯影影相，如果今次都拿到大獎，就相當於旅程有得「買一送一」。話時話，啲獎品雖然吸引，不過對於世界第一鋁廠生產商、上年收入去到110億美元嘅俄鋁來講，個規模就似乎比較濕碎。不過，俄鋁就喺總部特登請咗個靚女公關姐姐過來，聽佢講，個活動係慶祝俄鋁喺香港上市兩周年而安排嘅特別活動。「過生日」都咁慳，唔知係咪同公司近期非常頭痛嘅債務負擔有關呢？


email:piano@mingpao.com