諸葛紫岐婚宴 猛人雲集

【明報專訊】Neway二少薛嘉麟（Ernie）前晚同諸葛紫岐（Marie）大婚，唔少人可能最好奇嘅係盛傳唔啱Key嘅「阿嫂」陳法拉有無去飲，但原來呢餐婚宴上面有大量財經界猛人捧場，好似長實（0001）主席李嘉誠左右手霍建寧、國務院前副總理曾慶紅細佬曾慶淮同中石化集團董事長傅成玉竟然坐晒嚮女主家席，小琴聽講，原來身世一向低調嘅Marie媽媽蘇英係北京大官，所以先可以請到咁多猛人捧場喎。


紫岐媽媽是北京大官

薛二少同諸葛亮第63代傳人前晚喺會展擺酒，睇番男女主家席座位名單，男家主要都係以親戚為主，Ernie阿爸兼中星（0055）CEO薛濟匡同阿媽薛吳惠容，阿哥薛世恒同盛傳已經入咗門嘅「大嫂」（定準大嫂？）陳法拉都坐晒喺度。


不過當小琴一眼望落去女主家席名單就當堂嚇一跳，家住正喺會展隔離會景閣嘅曾慶淮竟然到場唔在講，就連霍老、傅成玉，同好少喺公開場合現身嘅厚樸基金話事人方風雷都坐晒響女主家席，同枱嘅橙天嘉禾（1132）主席伍克波喺一班猛人旁邊，星光都即刻暗淡咗。


Marie以前曾經同人講過媽媽係北京官員，但有老友同小琴講，佢媽媽蘇英其實係北京大官，喺內地人脈好廣，霍老、傅成玉等等都係佢老人家嘅老朋友。做開模特兒嘅Marie背景原來咁猛，唔知Neway第日返大陸搞Karaoke會唔會方便啲呢？


email:piano@mingpao.com