花樣年潘總姜育恒合唱 記者分不清

【明報專訊】喺小琴心目中，商人不嬲一心掛住賺錢，冇咩機會發掘自己其他方面嘅特長。直到噚日去參加花樣年（1777）業績會，收到張DVD做紀念品：主席潘軍竟然同80年代台灣著名歌手姜育恒一齊拍咗個MV。不過驚喜在後頭，小琴返到屋企認真聽完隻光碟，認為潘軍就算唔做房地產，都有機會靠出唱片發達。


業績會上派私人DVD

潘總大大隻隻、看似其貌不揚，講嘢又快言快語，完全唔似同「文藝」會有任何關係。小琴初初仲以為，佢凈係想借姜育恒個名，直到聽完一首佢哋合唱嘅《捨不得》，先發覺已經分辨唔到邊嗰算主角。條聲線究竟有幾靚？大家聽過就會知道小琴啲形容冇誇張。


仔細諗吓，潘總其實算得上係「文化人」，佢喺桂林幫藝術家起過SOHO，喺成都嘅發展項目又以充滿意境嘅「蜀人尋根」為主旨，話唔定「花樣年」嗰名都出自佢手筆，所謂人不可貌相，認真有道理。潘總不單止有藝術愛好，仲大大方方拿出來畀大家分享，又幾有明星作風。小琴估計，呢張碟可能只不過係潘軍嘅處女作，繼續「樂壇追夢」，相信佢唔會放棄。