拍東莞森林 3D數碼飈25%

【明報專訊】日本有村上春樹，香港就有個「向西村上春樹」。人地個挪威森林已經搬咗上大銀幕，而我哋個「東莞森林」亦都就快喇。蕭定一間中國3D數碼娛樂（8078）公布，用咗近7位數買咗呢個喺高登起家、紅遍網絡嘅神秘作家，佢本小說《一路向西》嘅版權，準備再掟600萬出嚟拍番套電影版。


向西喺Facebook埋怨無買走寶

消息一出，噚日隻8078個股價，唔似阿仙奴咁，剩係鍾意喺禁區外面「搓下搓下」，嘭一聲就炒起咗25%。「蕭生點解唔單聲，我家好嬲」向西就喺Facebook埋怨無入定先，又喺高登開post話「無諗過自己一個人，可以影響度一間上市公司股價」。


小琴即刻打畀阿一八卦吓，點解唔單聲畀向西知。「你叫佢咪呀，真係監都有得坐㗎，家出咗通告就買得喇」阿一話本嘢係得嘅，「講佢上深圳蒲，點知識咗個女仔，原來個胸係整過嘅，要衝出去大街呼天搶地……哈哈哈」佢老豆蕭若元都話好過癮，一定會叫埋阿向西齊齊度劇本，仲勸緊佢客串埋一份