證監批評索羅斯舊部基金

【明報專訊】證監噚日公開批評Penta Investment Advisers Limited，話Penta違反《公司收購及合併守則》，原本呢啲「公開批評」唔係咩重罰，不過小琴見到被批評嘅fund係Penta，就望多兩眼，皆因呢間公司就係人稱大鱷嘅索羅斯──嘅舊部John Zwaanstra搞嘅。


John Zwaanstra喺1998年成立Penta，呢隻對冲基金近年喺香港股壇都幾活躍，好多細價股例如民豐（0279）、馬斯葛（0136）同中大國際（0909）等等都有玩過。證監指摘Penta舊年9月中至9月底期間，有接近40個天安中國（0028）同聯合地產（0056）嘅買賣盤，冇按照《收購守則》規定作出披露。證監話，Penta承認違反《收購守則》規則22，並同意接受對紀律處分。不過，小琴記得，早排好似有消息話Penta因為市况不景，舊年年中仲管理緊29億美元資產 ，但今年初已經跌到20億美元唔夠，考慮將資金退番畀客仔後關門大吉，如果屬實，咁啲紀律處分都冇乜意義了。