鏞記員工 新年獲分百萬花紅

【明報專訊】被譽為「名人飯堂」嘅中環鏞記酒家，雖然近排因為家族爭產鬧到火紅火綠，但就無因為咁而待薄一班員工，啱啱過咗嘅農曆新年就派咗總共成百萬花紅畀員工，又大拿拿拎咗20萬出嚟畀員工搞大抽獎，所以最近就畀香港社會服務聯會嘉許做「商界展關懷」公司，肯定佢哋對員工嘅重視。


老闆畀20萬員工搞大抽獎

鏞記自從創辦人甘穗輝過身後，一直由二仔甘琨禮打骰，近排就同大哥甘健成因為爭產而對簿公堂。呢單現實版《溏心風暴》小琴當然有留意，所以更加覺得鏞記喺呢個時候都無忽略員工福利，都真係幾難能可貴。


早排因為爭產官司搞到好唔開心嘅二佬甘琨禮囡囡、鏞記財務總監甘蕎因相信心情好返唔少，佢話上年成本壓力唔細，但公司依然可以有盈利，一班員工出力唔少，為咗慰勞佢哋新年嗰陣就拎咗廿萬出嚟，全部200個員工人人有獎，獎品包括紅酒、鮑魚XO醬、瑤柱禮盒、名貴茶葉、高級廚具同埋獲500元至6800元不等嘅現金獎，一班有錢落袋嘅員工就梗係笑到見牙唔見眼啦！