劉永好：走私返內地最多係……雞

【明報專訊】前幾年本地走私幫好興用大飛偷運名車返大陸，家陣祖國富起來，各類需求亦愈來愈多。之不過各位看官估下呢幾年，走私返大陸最多係咩貨物？身兼新希望集團董事長嘅政協劉永好就開估，話唔係黃金、唔係電腦，而係雞。


大陸雞價 同海外相差甚遠

劉永好家族生意係家禽及飼料生產，對呢項生意最有發言權，佢話大陸家陣偷運肉類入境相當猖狂，往往係幾百噸，幾千噸，幾萬噸咁走，官方打擊完全不力。


劉永好解釋，走私集團之所以有利可圖，皆因大陸雞肉價同海外相差好遠。佢話，以舊年11月為例，11月份內地豬肉達到每17元人民幣時，係同期美國價格之1.79倍，歐洲1.48倍。更特別係，美國人只食雞肉，於是雞爪、內臟等，貿易商可以用超低的價錢收購，遠隔重洋之後，到岸價都仲遠遠低於大陸市場價格。


劉永好話，走私集團咁做，嚴重打擊大陸雞農生意，國家要好好管下先得咁話。