新聞類別
財經
詳情#
【明報專訊】雖然話政協委員去北京開會，講緊都係國家大事，係好嚴肅之事。之不過有時唔少委員講親都係八股說話，悶到抽筋，尤其晨早流流嘅小組會，真係一個唔覺意隨時被催眠到。內地第四大航空公司海南航空董事長陳峰就好有準備，出絕招來度過呢幾個鐘。
寫毛筆練氣功 抵抗睡魔急召
按規矩，十幾日的政協會議中，各政協委員日日都要開會，領導人在大會堂講話固然要聽，其他時間都要在酒店開小組會，講吓自己睇法。呢類小組會動輒三兩個鐘，遇到講話精彩都仲可令人精神一振，否則隨時悶到會被睡魔急召。不過有老友記者同小琴講，身兼工商聯政協之海航董事長陳峰，晨早開會完全沒問題。
業界盛傳，陳董每日朝早都會用古體豎版的宣紙線裝冊書寫感悟，在早前一個小組會上，陳董果真拿出迷你毛筆，一筆一劃在一本古體豎版書上寫低對溫總報告心得同感想。除咗寫毛筆字外，陳董還有保持精神暢旺的秘訣，因為佢寫完大字後，又將一條紅巾放放大腿上，雙目微閉，不時雙手交叉擺動，開始練起氣功來。
難怪接近三小時嘅會議結束後，當眾人難掩疲態時，陳董還可以炯炯有神咁一律以「跟溫總報告沒關係」為由拒絕所有記者提問。
email:piano@mingpao.com
留言 (0)
