公務車限買國產 原來唔包領導

【明報專訊】內地早前公布，要求各黨政機關今年買車只能買國產品牌。而且價位仲要控制係18萬元人民幣以下。誰不知，原來呢個規矩係唔包括領導用車，即係話，普通公務員只能用平平地的國產車，至於領導，就平治寶馬都無問題也。


透露呢個消息的，係全國政協經濟委員會副主任、工信部原部長李毅中，佢老哥早兩日篤爆，話中國公務車採購目錄中的公務車，只係「普通公務車」，並唔包括「領導幹部公務車」。李毅中話，工信部相關工作人員同佢講，目錄中的普通公務車，係1.8升以下、售價18萬元以內的轎車，並唔包括領導幹部公務車，兩者唔係一個系統。2月24日，工信部發佈本年度中國公務車採購目錄，其中包括比亞迪同吉利等412個汽車品牌，全部係國產車。