摩通李晶：美國商人轉軚 唔信中國「硬着陸」

【明報專訊】小琴噚日去CFA協會個「亞太區投資會議」學嘢，遇上摩根大通董事總經理李晶做嘉賓講Talk。原來佢啱啱喺美國返來，前兩日喺邁阿密參加咗個論壇，當場搞咗個「民調」，問啲鬼佬「有邊位相信中國經濟會硬着陸」，全場800幾人竟然得1位舉手，仲因為眾目睽睽之下壓力太大，最後放番低。


相隔4個月 美國人轉變大

李晶話，11月初嗰陣佢搞過一個類似嘅即場調查，幾乎有三分之一人舉手，幾個月之間轉變咁大，說明大家對中國嘅宏觀經濟已經冇咁擔心，開始關注番個別企業嘅盈利狀况。


李晶就話，自己最鍾意利用呢啲國際場合，蒐集新鮮熱辣嘅市場情緒，幾百個人嘅投票可以5秒鐘搞掂，又快又環保，唔怪之得財富雜誌（Fortune Magazine）要連續3年選佢做「全球50最強女商人」之一啦。話時話，如果小琴都咁有號召力，一定走去開番間公司，專門做即時市場調查，相信大有前途。


email:piano@mingpao.com