「廉署剋星」話無眼睇

【明報專訊】創業板股仔無縫綠色（8150）早排同前主席、有「廉署剋星」之稱嘅林炳昌搞到不歡而散，仲搞到要告上法庭，公司噚日就終於批咗2800萬份option（認股權證）畀林大狀兼庭外和解。林大狀同小琴講，話公司家內部好似幾混亂，寧願做番自己律師嘅老本行，仲即時賣晒批option劃清界線咁話喎。


林大狀早排同無縫綠色董事會炒大鑊，提出要折讓價全購，後尾仲因為公司遲遲唔批option畀林大狀而鬧上法庭。小琴噚日就即時打畀林大狀，佢話無再理無縫綠色嘅問題啦，只係聽講公司內部家「亂晒籠」，所以已經即時將嗰批option轉咗手。


睇番聯交所資料，林大狀原來喺上個禮拜五（2日）已經用每份0.157元將嗰2800萬份option賣走，計佢每份認購價0.05元，林大狀呢次都叫賺番差唔多300萬，不過中間搞咗咁耐，佢就似乎覺得唔太值得啦。