恒生公關阿頭 跑馬拉松求「突破」

【明報專訊】講起恒生（0011）傳訊部阿頭張樹槐，大家都知佢對跑馬拉松樂此不疲，家佢嘅大名連90後嘅青年人都知！因為最近佢接受《少年警訊》嘅訪問，講吓長跑嘅心路歷程。可以同一班年輕人分享，佢話不知幾感欣慰。


接受少年警訊訪問

水哥（張之暱稱）話，十年前開始長跑只係為咗事業外尋求突破，結果不單止跑遍五大洲，仲感染到同事、朋友同親人，甚至被邀請公開演講，同其他人分享長跑經驗，令佢實在意想不到。


佢上個月接受咗《少年警訊》兩名90後嘅小記者訪問，令佢進一步打入後生仔嘅世界，因為《少年警訊》擁有17萬個少年會員。話時話，水哥嘅馬拉松生涯之中，已完成咗32項賽事，總路程有成1500公里，嚟緊佢仲會繼續挑戰自己，堅持參加不同嘅馬拉松，時間更要愈來愈好呢！