新聞類別
財經
詳情#
【明報專訊】雖然香港係國際金融中心，又係中西文化融合嘅地方，不過喺男女平等方面，仍有可以改善嘅地方。噚日渣打銀行同非牟利機構社商賢匯發表研究報告，顯示今年度恒指成分股企業合共634個董事職位中，只有57個由女性出任，即係得9%。研究機構話，比較歐美地區，呢個百分比明顯較低（見圖），必須推行更多措施改善咁話。
社商賢匯董事馬夏邐話，比較起2009年同類研究所得的8.9%，今次女性董事嘅百分比只係輕微改善咗0.1個百分點。佢話，美國有研究指出，如果董事局入面有一半係女性，間公司嘅股本回報率會較高，但香港有啲上司可能覺得女性要兼顧家庭同事業，令女性晉升機會冇咁多。不過馬夏邐都講番，高回報同女性做董事之間有咩關係，仲係無人知道。
20家藍籌全男班董事局
報告又顯示，48家藍籌股中，只有28家委任女性擔當董事，其餘20間董事局內則完全無女性。另外，只有16家企業委任超過1位女性董事，而所有執行董事職位中，得6.7％由女性擔任；48家企業入面，只有華潤電力（0836）由女性擔任董事會主席，而恒生銀行（0011）係由女性出任行政總裁。
至於女性董事百分比最高企業排名分別為恒生銀行，16名董事中有5名為女性，其次係中國銀行（3988）15位董事中有4位為女性，以及匯控（0005）17位董事中有4位為女性。至於渣打自己呢？渣打香港行政總裁洪丕正就話，集團有2位女性擔任非執董，至於渣打香港，就有3位女性出任董事。
email:piano@mingpao.com
留言 (0)
