愛馬仕輸畀愛瑪仕

【明報專訊】iPad商標爭拗終未完，法國奢侈品「愛馬仕」（Hermes）又遇勁敵！內地媒體噚日話，1977年喺中國註冊英文商標「Hermes」嘅愛馬仕時，竟然漏咗註冊中文商標，直到20年後，先發覺原來早已有間達豐製衣公司將「愛瑪仕」收歸麾下。


如夢初醒嘅「愛馬仕」，開始咗長達十多年嘅維權之路，先後3次向內地商標評審委員會提出撤銷土產「愛瑪仕」商標嘅申請，不過到家都仲未成功。內地法院話，「愛馬仕」提交嘅大部分證據都晚於土產商標嘅註冊時間，所以土炮「愛瑪仕」唔需要註銷，可以繼續使用。


法院裁定無問題 土炮「愛碼仕」照賣

雖然「愛馬仕」、「愛瑪仕」，多少都仲有差異，但大家可以想像，賣緊3000蚊一條「愛馬仕」絲巾嘅愛馬仕主席Bernard Puech，去到上海視察時，見到旗艦店外幾條街上嘅「愛瑪仕」專門店，賣緊30蚊一沓絲巾，唔知幾肉酸。呢啲英法老牌家族企業，唔擔心要使幾多錢消災，唯獨最擔心嘅就係幾十年、甚至幾代人心血打造嘅品牌，頃刻間變成街邊貨。


小琴搵番內地註冊商標收費，除咗1000蚊申請費外，一個中文商標現時要120蚊，英文商標200蚊，圖形貴少少，要240蚊一個。所以，唔怪至得facebook創辦人朱克伯格，前排喺內地瘋狂註冊商標，但都係遲咗，因為最流行嘅「臉譜」、「臉書」已經被中國人搶註咗，小琴套用內地嘅一句流行語，就係地球已經無法阻止國人嘅奪商標進程！


email:piano@mingpao.com