畀四叔讚後生 陳永傑笑開懷

【明報專訊】好多人都知，人稱「四叔」嘅恒地（0012）主席李兆基為人風趣，講嘢唔鍾意照稿讀。噚日四叔就向中原頒發「恒基金牌」大獎，表揚佢哋去年幫恒地賣出總金額超過40億元嘅物業，咁幫得手，四叔當然即場派大利市畀中原地產嘅亞太區總裁陳永傑同一班董事啦﹗


四叔頒代理獎 中原利嘉閣奪標

陳永傑仲同小琴講：「四叔話我哋係老拍檔，當年天匯第一宗成交都係我哋幫手。」細數當年威水史之餘，四叔仲大讚佢哋係年輕人，好有魄力，聽到四叔讚自己後生，陳永傑當然即時笑到見牙唔見眼啦﹗


其實中原已經係連續第七年拎呢個獎，陳永傑話今年主要係做咗60幢比華利山別墅洋房，亦要多得四叔推出大優惠配合，吸引班客入市。至於兄弟行嘅利嘉閣，今年亦係連續第七年奪得「2011年度恒基金牌」（組別冠軍）。不過美聯（1200）同港置今年就無去呢個頒獎禮啦﹗