武漢工展會 找港韓藝人撐場

【明報專訊】好多香港人都會去過喺維園舉行嘅工展會。唔講你唔知，工展會係由中華廠商聯合會舉辦，而且近年仲進軍內地，好似今年4月底到5月初，就會去武漢搞，搞手廠商會副會長吳永嘉話，會搵埋TVB小生黃宗澤，同埋一隊韓國女子組合去武漢撐場。吳永嘉話因為韓國女子組合未覆實，所以暫時要賣關子。


工展會喺香港搞得有聲有色，每年聖誕前後喺維園都會搞番三幾個禮拜，剛剛完成的一屆到訪人次有252萬，再次破紀錄。喺內地唔少城市都有搞過工展會，今年仲分兩次去武漢同福建泉州。


泉州多民企 也會搞工展

咁啱廠商會新任會長施榮懷係福建泉州人。施榮懷噚日就同一班新聞界解畫，話工展會去泉州同佢家鄉背景完全無關。主要係因為泉州民企雲集，嚟咗香港上市嘅就有安踏（2020）、恒安（1044）、361度（1361）等廿幾間公司，同香港有深厚淵源，香港品牌上到去應該認受性幾高。