必瘦站女神 換來金肥牛

【明報專訊】小琴最鍾意有公司首日掛牌嗰陣去湊熱鬧，前晚就聽講必瘦站喺一番波折之後終於可以最終上市，當然要一早起身去捧場啦。趕到去港交所，見到原來已經敲完鑼交換緊禮物，有兩個人喺台上握手微笑，仲一齊捧住一隻肥嘟嘟嘅金牛。小琴心諗，做纖體生意嘅必瘦站點解要送隻肥牛畀港交所呢？
答案好快揭曉，原來隻牛係港交所送畀必瘦站，必瘦站就馬上送番個身裁非常正嘅銀閃閃女神像。哦，原來如此，個女神Fit過隻牛多多聲，咁先似樣啊嘛！
套票目的﹕「打風落雨」都要減肥
小琴來捧場，另一個非常重要嘅原因就係有得食乳豬，點知突然間聽到隔離有人話：「乳豬咁肥，必瘦站會唔會唔畀我哋食㗎」，嚇到小琴即刻四圍搜索，直到真係見到一大盆乳豬先安心。
一邊咬住嚿豬肉就一邊去聽主席歐陽江講嘢，佢講到大家都非常關心嘅套票經營模式，話其實係行內非常普遍同埋合理嘅做法，避免顧客滋生惰性，只要一次買晒一個療程就可以無論「打風落雨」都準時去纖體。小琴聽咗都有小小吃驚，話唔定啲人願意畀咁多錢減肥，都係希望多番啲壓力、堅持到底。無論如何，連掛牌儀式都咁多得意經歷，不愧係超購30幾倍嘅熱門股啦。
email:piano@mingpao.com