sell「冷凍食品展」 傾足14年始搞掂

【明報專訊】噚日有間公司宴請傳媒，成班行家見到個名既熟悉又陌生。所講嘅就係新創建（0659）旗下，為港府同貿發局打理灣仔會展呢頭家嘅會展管理公司。


公司副董事總經理梅李玉霞Monica都話，公司過去都係默默耕耘，為香港會展業發展響背後做好多工夫，只係冇點同外界透露。好似今年佢地爭取到一間美國公司響會展搞第一個「冷凍食品展」，Monica就自爆早響1998年就同個客傾，個客由原本嘅唔係咁有信心，到後來索性響香港設立分部，搵Monica租場地辦展，竟然傾足14年咁耐。


展覽需配合檔期

唔怪得Monica話做會展管理唔係坐響度就有人主動埋嚟租咁簡單。「要配合國際同類展覽時間，要睇會展有冇檔期，而且我地對選客戶都有條件，唔可以搞臭香港國際會展之都美譽嘛。」