匯豐搵專人 睇歐洲人幣業務

【明報專訊】離岸人民幣業務係香港以至其他國家城市最想分一杯羹嘅金融界新發展，要把握先機，就要投資培訓人才。好似匯豐喺倫敦果邊，都特登搵來原本睇開歐洲區信貸交易嘅Paul Gooding，擔任歐洲人民幣業務發展主管，聯同英國嘅公營企業同埋商業銀行，聯手發展倫敦作為人民幣中心。


三強聯手創人民幣商機

事實上，上個月香港金管局同埋英國財政部就宣布，雙方成立一個由5間銀行代表組成嘅合作小組，推動香港同倫敦喺離岸人民幣業務發展方面合作，匯豐當然係其中1間銀行代表。其實匯豐香港區業務規劃及策略主管潘漢生，同埋環球資本市場人民幣業務發展亞太區主管何嘉儀，分別睇實香港同埋放眼亞太區嘅人民幣市場發展，加埋阿Paul喺倫敦睇實離岸人民幣有咩商機，小琴同大家一於拭目以待佢哋會有咩新招數推出。