新創建員工幸福 5天制兼有生日假

【明報專訊】新世界發展（0017）同系內一眾公司1月份股價大升，之前因為供股事件牙痛咁聲嘅小股東，條氣應該順返啲。小琴唔知道做新世界嘅股東好唔好，但同彤叔鄭裕彤打工就肯定好，皆因彤叔出晒名有人情味，佢貴寶號周大福號稱從來唔炒人外，早排仲有探子回報，周大福珠寶（1929）部分前線員工出咗十幾個月花紅，認真過肥年。


其實除咗花紅，新世界系公司舊年開始實行5天工作周，喺華資大企業中算行得前，都值得一讚。聽新創建（0659）靚女公關講，佢哋公司有5天工作周之餘，仲有「生日假期」，所有員工喺生日起1個月內，可以任擇一日假期，老闆冇得say no！


生日假期 以往只有外資公司有

生日假期唔係話好新穎，之不過一般都係外資公司先設有呢個福利，華資公司相對較少，真係聽到都妒忌。靚女公關仲話，公司會每個月幫同事搞生日party，唔知新創建執行董事鄭志明，即係彤叔乖孫Brain，會唔會都出席呢啲生日party呢？