有線電視出App

【明報專訊】小琴留意到，有線電視近期出咗個新服務，只要喺App Store度下載個叫「Cable即時睇」嘅App，就可以喺iPhone或者iPad度隨時隨地睇電視節目啦。今次個App就開咗5個頻道，內容包括新聞、財經、娛樂，仲有得睇英超同埋球彩。小琴一直都發覺，現時啲移動設備真喺愈來愈巴閉。小琴喺App Store度輸入「電視」做關鍵字，竟然搵到500幾個App，睇嚟無論幾挑剔嘅朋友都會好容易找到自己個Channel啦。


小琴自從自己買咗部iPhone之後，等於隨身攜帶Youtube同埋咁多款電視節目，似乎睇屋企部真正嘅32吋電視都少咗好多。手機功能愈來愈豐富，唔怪之得愈來愈多人喺港鐵度低頭望住自己個屏幕仔咁認真。雖然無相關統計，不過小琴估計「搭過龍」唔記得轉車嘅乘客數目好可能係同電視App嘅個數目成正比。