中原派開單利市大減七成

【明報專訊】中原今年重料炮製嘅開單利市，凡係年廿九到初三開到單嘅代理，無論係買賣，定租賃都可以獲得千元開單大利市，金額仲比去年大升一倍。不過市况咁淡靜，小琴喺過年前都預言過呢封開工利市唔易。果然，到昨日大年初四，中原只係派出咗約50封開單利市，比去年足足少近69%。至於50元嘅開工利市，今年就派咗逾4000封，總值逾20萬元。


中原地產亞太區住宅部總裁陳永傑就同小琴講，今年宗數大幅下跌，除咗係受到由兔年樓市淡風吹到龍年嘅影響外，仲受到農曆年嘅寒冷季候風所拖累，買家凍到唔肯出街，睇樓量梗係大打折扣啦﹗好在美國聯儲局議息後話會維持低息到2014年底，陳話呢個消息會有助加快買家入市步伐，不過一講到政府，佢都話政府一日唔放寬調控，物業市場都好難有大起色。