伙內地藝術家 Coach推龍年版手袋

【明報專訊】龍年將至，呢段時間對啲商家來講就唔止準備過節咁簡單，各種「龍年特別版」產品陸續登場，令人眼花撩亂。


最近Coach都加入「龍產品」行列，同內地藝術家合作，設計咗幾款龍年版男士手提包、證件包同埋銀包，產品由1850蚊至到5350蚊不等，唔捨得豪購龍版豪車或者名表嘅朋友，都可以考慮買番個留作紀念。


中國市場吸引環球商家

龍年似乎比過往都更加多特別產品，小琴覺得，一來係因為中國市場愈來愈吸引環球商家，二來可能因為其他十一個生肖嘅動物代表，都唔夠「龍大哥」咁有中國特色。試諗下，坐喺部龍版Rolls-Royce入面，攬住個Coach龍袋，再玩吓龍年版憤怒鳥——睇怕以前啲坐龍椅嘅皇帝都冇咁風光。


借住一團龍氣，小琴提前同大家講聲：恭喜發財！