過年搵人返工 葉氏化工出到四工

【明報專訊】全球最大酯類溶劑生產商葉氏化工（0408）創辦人葉志成去年宣布退休之後，盤生意就交咗畀細佬葉子軒打理。阿細葉生過去主要專注集團嘅前線工作，但家就由見客改為見「芬佬」、見記者。


可能係本身多同客傾生意，細葉生響生意經方面真係特別多經驗分享。好似噚日咁，佢就同成班行家講起當年點樣傾成一筆好重要嘅生意，呢個客合作多年，一直都係集團嘅大客仔。


但細葉生話，啱啱開始合作果陣都試過差啲出事，佢好記得果陣過新年，呢個客年終無休，一定要有貨供應，偏偏化工原料唔可以預先放倉，冇得提前送貨，而葉氏員工都放晒假，如果斷咗貨，難保會因此冇咗呢個大客。


「當時我諗，我哋公司咁多人，搵兩三個司機加班送幾日貨唔會搵唔到啩。」於是細葉生「重賞搵勇夫」，以4倍日薪加補假加請旅行，卒之解決新年送貨問題。成班行家聽完立即流晒口水，如果我地呢行新年返工都有4倍人工就好囉。