比亞迪「穩守」A股招股價

【明報專訊】「股神愛股」比亞迪（1211）近年可以話係流年不利，H股股價由高峰期88蚊跌到就嚟頂唔住，至於佢嘅A股年中千呼萬喚始上市，頭幾日都叫做升過吓，但近排就同H股好似孿生兄弟咁一齊跌過唔停，噚日仲一度跌穿招股價18蚊人仔水平，收市頂住報18.03元人仔，但睇怕都唔捱得幾耐咯。

比亞迪08年有股神巴菲特入股後，電動車電池概念畀人捧到上天，H股股價由8蚊炒到上88蚊，當時小琴就聽到唔少內地股民投訴，猛咁呻話佢哋無機會投資一間咁好嘅內地民企咁話喎。

H股昨又逆市跌0.2%

傳統智慧都有話盛極必衰，比亞迪09年尾開始真係「衰」，銷售下跌、產品安全性被質疑、變相裁員，A股保薦人瑞銀因為公司業績差一齊拉埋落水畀中證監叫去照肺，H股噚日收市跌0.2%至12.6蚊，A股股價仲貼實個招股價，認真係「衰」到貼地。

咪睇小比亞迪A股跌穿招股價，皆因有股神光環，就算H股股價好似食瀉藥咁跌，比亞迪A股年中招股一樣有唔少股民捧場，以當年中石油（0857）A股上市大跌，股民激動到就嚟要上街一樣嘅表現，難保唔會變成社會問題。

不過傳統智慧都有話否極泰來，比亞迪「否」咗差唔多兩年，唔知幾時可以「泰」來呢？

email:piano@mingpao.com