新意網轉主板 創業板凋零

【明報專訊】香港個創業板成立都差不多12年，除咗開頭一兩年科網潮未爆破前，都叫做活躍外，咁多年來真係愈做愈沉。交投少不特止，有質素公司更加買少見少，有唔少具實力之企業，都對創業板避之則吉。近年更加有唔少創業板台柱，一夠資格都即轉去主板上，以爭取更多曝光。噚日就有新地（0012）旗下之新意網（8008）宣布要走頭。

板內市值第8 噚日成交73萬

作為早年科網遺孤，新意網可謂創業板「創板元老」之一，2000年上市時以每股10.38元招股，引來投資者追捧，市值一度高達200幾億。不過自科網泡沫爆破後，新意網股價直插谷底，最低試過得返幾毫子，家陣亦不過得0.95元。捧場客如果由IPO長跟到家，身家都蒸發九成以上。講開創業板，有老友話，家成個板簡直可用鬼域來形容，交投極之稀疏，即使新意網，呢個係成個創業板市值計排名第八之公司，噚日成交都不過73萬元咁大把，可想而知其他零碎股交投會點。所以有老友講，如果港交所仲唔做吓嘢，改善市場環境，到時真係GEM Board（創業板之英文名）變GERM Board，只能生蟲也。