阿里巴巴 推平板電腦鬥iPad

【明報專訊】阿里巴巴集團將會喺今日於根據地杭州舉行商貿大會，廣邀傳媒參加，小琴一名記者老友都有親赴現場，佢話，阿里巴巴旗下嘅阿里雲總裁王堅喺大會之前，率先同傳媒會面，仲透露計劃喺兩個月內推出阿里雲平板電腦，實行由商貿市場殺去流動業務咁話。

最近阿里雲先同內地廠商天語出手機，王堅唔肯同記者講賣成點，剩係話滿意。佢講，十幾家手機商都有搵阿里雲，同佢哋傾出阿里雲手機之事，包括幾家世界級手機品牌在內喎，佢又講有意喺兩個月內，再接再厲出平板電腦，王堅強調阿里無心做製造商，只想專心做OS（平台系統），咁究竟會同邊間廠商合作就封口不提。王堅又解釋，阿里雲同Android、iOS最唔同嘅地方，係阿里雲毋須大家花時間裝Apps，大家想玩邊個Apps，只要上網喺阿里雲度搵一搵，就可以即時連線，喺雲端平台上享用。佢就講，Android這些平台太多遊戲，阿里雲想做更大更多嘅事，好似幫到人用手機上淘寶，等大家可以用阿里雲「慳錢、賺錢」咁話。