歐洲股神 玩回購撐基金

【明報專訊】股市睇唔透，連有「歐洲股神」之稱嘅富達國際投資總裁安東尼•波頓（Anthony Bolton）近期都遇滑鐵盧，旗下中國基金表現不濟，股價低沉，面對投資者沽售，為表信心，基金成立以來首次回購，真係英雄都有落難時！波頓連續20年被評為英國最出色嘅基金經理，退休後因看好中國而重出江湖，搞呢隻基金，一心想再創一番戰功。

呢隻中國基金名為富達中國特別情况基金（Fidelity China Special Situations Fund，FCSS）舊年4月掛牌，向投資者嘅賣點係體驗世界經濟權力嘅重新定位，不過今年比起基準指數表現差半成，投資者「拿拿臨」趕住出貨，搞到呢隻在倫敦交易所掛牌的基金價位仲低過淨資產值，年初至今個價位已經跌咗兩成半，差過大市，波頓為咗表現出長線睇好呢隻基金，用咗38萬英鎊（折合471萬港元）入市回購基金單位， 基金個價一度升返半成，投資者都有些安慰，不過，比舊年仍蝕兩成，同期MSCI中國指數只係跌咗約15％。

斥471萬回購 基金曾彈半成

波頓喺過去28年管理基金嘅經驗中，以年度化計每年足足有兩成回報，唔知佢嘅威名今次會唔會敗喺呢隻基金上。事實上，波頓6月時已經坦言呢隻中國基金表現令人失望，因為中國股票家陷於困境，不過亦有佢嘅粉絲支持佢，話投資者揀基金經理，起碼要睇3年表現，唔可以用太短時間衡量。波頓嘅傳奇能否保持，就等大家一齊拭目以待。

報料電郵﹕piano@mingpao.com