無悔東征西討

【明報專訊】成立於60年代末的合和一度是香港的重要地產商，與當時的長實（0001）和新鴻基地產實力相差不遠，但多年來在海外和內地東征西討，現時市值卻遠遜，可有後悔？

胡應湘如此回應：「如留在香港，可能蝕晒添，其實香港有好多房產商已死咗，只是冇人知。點解要後悔？對自己有信心，不怕被人唱，我只是一個簡單的工程師，只是老竇畀些少本錢開始，做到這樣，已很滿意。」

「你10億，100億，1000億，又點樣？未必有我咁開心，咁安樂。」

撐子胡文新做得好

胡應湘近年漸將合和業務交予長子胡文新打理，並委任其為合和實業及合和公路基建董事總經理，那會否認為第二代不如人家？「合和業績愈來愈增加，沒有停滯，人比人，比死人。囝囝畀多少分？不好畀，至少不會如人家，至少沒搞到要負債！」

「九龍展貿中心可以再搞好啲？世界乜都可以再搞好啲，新鴻基可以搞得好啲，長實也可以搞得好啲。間間都可以搞得好啲，冇法子可以追求完美。咁多年沒有理人家點睇。」