匯豐慈善基金再捐3000萬

【明報專訊】匯豐前日啱啱突然「插播」《家變》，第二日就演繹番《仁心仁術》。匯豐噚日喺中環總行地下，慶祝匯豐銀行慈善基金成立30周年來，撥款已超過10億港元。喺今年6月額外再捐3000萬造福社區項目，匯豐話希望好多商界嘅朋友，可以聽到匯豐嘅經驗分享，一齊做多啲好事。

匯豐今次請咗勞工及福利局長張建宗同環境局長邱騰華捧場，仲有森美、陳芷菁搭檔主持，何等隆重。匯豐企業可持續發展總監區佩兒就話：「呢此活動唔單止係慶祝慈善基金成立30周年，仲表揚無論過去、現在或將來匯豐都會緊密聯繫香港市民，一同展望未來。」

噚日呢個慶祝會大大話話搞咗個幾鐘，難得兩位政府高官下晝3點到場之後，一直坐到尾，相當畀面。噚日張建宗局長都話，聽到匯豐要裁員當然唔係好消息。希望獅子銀行今後可以為香港帶來更多好消息，造福社群。