龍湖吳亞軍有「三不」

【明報專訊】胡潤榜新科女首富吳亞軍係龍湖地產（0960）嘅主席，同小琴都有過幾面之緣。不過，此人甚為低調，奉行三不政策：不簽名，不上鏡，不接受採訪。

其實，呢三條執行起來都幾麻煩，但龍湖做得到！話時話，小琴啱啱收到一份龍湖嘅採訪邀請，只籠統寫住公司管理層會出席，不過，其後公關打電話嚟講，吳亞軍會出來。既然出來，又點可以唔接受採訪呢？

公關將兩個條件細細道來，第一，隨行唔可以有攝影記者，吳亞軍唔影相；第二，所有採訪內容出街時，涉及到吳亞軍嘅發言，一律用「公司話」，唔可以出現吳亞軍嘅名。

講真，小琴都幾欣賞呢位低調主席，佢唔係扮嘢，而是認真將低調貫徹到底。其實，內房世界都幾精彩，有低調嘅吳亞軍，更有高調嘅許家印，各有各風格，小琴都可以多啲八卦吓。