新聞類別
財經
詳情#
【明報專訊】新上任3個月嘅渣打中國個人銀行總裁崔晸圭，唔知係咪怕韓國人嘅身分難同內地班同事打成一片，上場以來一路大打溫情牌，唔止跟足內地潮流開微博收納粉絲，仲同一班高管親自向前線員工派早餐，班手足晨早流流一入公司就見到成班老細著住圍裙托住托盤，未瞓醒仲以為去錯咗快餐店，老細你真係搞到班細嘅好鬼驚喜！
韓籍總裁 每周學4個鐘普通話
崔先生話咁做係要服侍前線，再由前線服侍客戶，將心比己咁話。上任以來佢一直去內地各個省市巡舖，佢仲計住自己已捧咗17次早餐、5次下午茶，目標係喺出年6月前，巡晒目前72個渣打中國網點，間間分行捧一次餐。唔知係咪老細夠親民，佢嘅微博已經有900幾個粉絲追蹤，為咗同國內員工同聲同氣，崔晸圭家每星期學4個鐘頭普通話，佢又話自己最鍾意嘅中國菜係四川麻辣火鍋，哈哈，如果同埋成班手足去打邊爐，一齊烚下烚下，真係好易熟呢！
渣打之前公開講過，今年目標網點係增加到100間，雖然崔先生唔肯講最新目標，但佢話因應各個地區嘅分行調整服務時間，網點嘅服務容量已經增加咗兩至三成。至於人手方面，負責個人銀行業務大概有3500個員工，間間外資行都鬧人才荒，因為好多人喺外資行有一定經驗後，都會跳槽去返內銀，所以佢話想繼續增聘員工。
報料電郵﹕piano@mingpao.com
留言 (0)
