國際清算行經濟學家 過檔摩通掌中國研究

【明報專訊】中國經濟起飛，唔少證券商都會聘請中國經濟師，研究下中國嘅經濟狀况。小琴最近就收到風，摩根大通請咗前國際清算銀行經濟學家朱海斌，接替已經離職嘅王黔，出任中國首席經濟學家兼大中華區經濟研究部主管。

聽講呢位叫朱海斌嘅人兄，喺2001年以來一直擔任國際清算銀行嘅經濟學家，喺香港同巴塞爾返工，其間佢發表咗唔少報告，課題包括有金融市場穩定問題、中國房地產周期、風險管理和銀行監管等等。佢畢業於北大，亦喺美國杜克大學獲得經濟學博士學位。

至於摩通之前個位中國首席經濟學家王黔，就喺2006年加入摩通，之前一直喺中大商學院教書。無獨有偶，王黔同佢嘅接任人朱海斌，都係美國杜克大學嘅校友，王黔喺杜克大學修讀嘅，係經濟學碩士學位。