新聞類別
財經
詳情#
【明報專訊】一年一度嘅胡潤富豪榜又開估，上年都仲排緊「梗頸四」嘅三一重工老闆梁穩根今年就成功上榜首做咗2011年度中國首富，可以話係幫佢嚟緊嘅香港上市大計冲喜下，不過有人歡喜有人愁，今年要數最愁可能係比亞迪（1211）老闆王傳福，09年仲做緊首富嘅佢，今年插水式跌到落第44位，都咪話唔陰功。
同長實（0001）主席李嘉誠長期穩踞香港首富嘅情况唔同，胡潤富豪榜成立13年，首富位置幾乎年年換人，而梁老闆就係第10位首富，佢身家比上年增長咗近九成到700億元人民幣，睇返胡潤主要係計算富豪手上上市公司股份市值，睇怕三一重工上市後，佢身家又會再三級跳。
十大富豪 4個內房老闆
小琴睇睇今年胡潤富豪榜頭十位名單，變動其實都幾大，當中有4個人上年都係十大不入，而且內房老闆反彈力度最大，恒大（3333）大股東許家印同碧桂園（2007）大股東楊惠妍舊年分別排名25同21位，今年就高踞第5同第10位，排名齊齊上升超過10位，許總仲爬埋萬達老闆王健林頭，成為內房首富；至於啱啱辭任龍湖（0960）CEO職位嘅大股東吳亞軍，就排咗喺第7位。
王傳福跌落第44位
至於兩年前仲係中國首富嘅王傳福，上年已經跌出十大排喺第12位，估唔到低處未算低，公司業績差搞到股價繼續插水，連帶富豪榜排名都插水式下滑，今年跌到落第44位，雖然重槌投資喺比亞迪嘅股神巴菲特都而家都仲賺緊錢，但係望住股價由88蚊跌到得返10幾蚊，再望下王傳福富豪榜排位一齊插水，又會有咩感受呢？
報料電郵﹕piano@mingpao.com
留言 (0)
