高盛邊唱好高鑫邊出貨

【明報專訊】大行啲盤房同研究部據講分得好開，皆因有防火牆喎。不過，有時可能係冥冥中有安排，啲大行報告同盤房出貨啲timing，真係夾到你估唔到，好似投行巨人高盛，噚日朝早出咗份報告唱好上市冇耐嘅高鑫零售（6808），另一邊廂，大利市機個畫面上就見到，高盛一早排好盤狂隊高鑫，冇辦法唔套用星爺喺《唐伯虎點秋香》入面嘅名言：「何其壯觀」！

高鑫7月底掛牌，以首日升幅計係今年第二賺錢新股，僅次於今年「新股王」米蘭站（1150），而高盛就係高鑫上市時嘅安排行之一。

事隔個幾月，高盛噚日出咗份報告，將高鑫投資評級由「中性」調高到「買入」，原因係高盛對於高鑫利潤率前景睇法更正面，仲將佢納入亞太區買入名單。報告又話，為咗反映該公司毛利率走勢強勁，調高今年至2013年每股盈利預測最多一成，基於2012年市盈率35倍，目標價由10.8元調高至11.8元，比起現價有成21%上升空間！

高鑫沽盤牌 高盛高高掛

以高盛嘅江湖地位，出得份咁正面嘅報告，通常即時股價都會有啲反應。可惜碰着噚日上晝跌市，高鑫個價始終彈唔起，最多跌過近半成。加上小琴又發現，高盛盤房噚日一早就排好盤出貨，大利市機顯示掛出沽盤嘅牌大部分都係高盛，雖然話盤房同研究部有防火牆，不過個timing靚成咁，又真係容易惹人遐想嘅。

報料電郵﹕piano@mingpao.com