「劉翔」在港成立中國劉翔集團

【明報專訊】劉翔進軍商界，兼且在香港成立咗「中國劉翔集團」？大家係唔係同小琴一樣好奇，佢來搞咩生意呢？咪住，原來此劉翔非彼劉翔，只不過同名同姓，兼且並不玉樹臨風，有相為證。

1萬蚊註冊股本 買斷商機

呢位劉翔乃山東人士，於上個月9號創辦咗呢間新公司，註冊股本1萬蚊港紙。由佢來成立「中國劉翔集團」本來都無可厚非，行不更名，坐不改姓，而呢位創始人姓劉名翔，如假包換。

只不過，小琴諗緊，如若正牌飛人劉翔都想自己搞間公司，佢仲可以用咩名註冊？譬如「劉翔12：88」，呢個係佢創造嘅110米欄世界紀錄；又或者「劉翔VIP」以同呢位無名小卒區分，不過，愈多形容愈唔似正牌，反而呢位捷足先登嘅山東劉氏已經用1萬港紙買斷商機。

換作小琴係飛人劉翔，家已經好驚，一定星馬台、內地、美加，逐一咁check一遍，或者直情全部用自己嘅名註冊晒，費事日後鬧出「瀉霆鋒」咁嘅事。

話時話，「李寧」呢排有啲唔掂，或者「劉翔」一出，誰與爭鋒都話唔定。飛人會不會即時收購咗呢間公司，親自出山搞生意呢？小琴梗係會密切關注事態後續發展，同各位報告啦！

報料電郵﹕piano@mingpao.com