「輪后」珠珠 11月披嫁衣

【明報專訊】小琴最近收到風，話有「輪后」之稱的法巴零售衍生產品部聯席董事趙海珠（下稱珠珠）將會喺11月披嫁衣，老公係佢喺科大讀工商管理碩士（MBA）時嘅同學。聽講男方都有小小家底，做開物流生意，但珠珠唔會嫁完就做少奶奶，仍然會繼續喺「輪壇」，做最靚嘅代言人。

珠珠雖然離開「公仔箱」都有好幾年，但仍然好多人懷念，佢嘅一舉一動亦特別惹人關注。舊年暑假佢短暫休息，去日本做碩士交流生，一去3個月。聽講佢嘅未來「蝦子餅」就係喺佢學成歸來後不久，向珠珠求婚，佢亦好快就答應。

老公係科大MBA同學

兩口子因為怕婚禮太多人要招呼，決定去印尼峇里島行禮。兩人而且早已影好晒結婚相，並且在Facebook同一班老友分享，真係Sweet到爆。聽講佢地夫婦二人，仲係同月同日出生，兩個都係9月25日生日，怪唔之得咁投契。雖然「輪場」工作忙碌，仲要成日住個市，但希望珠珠婚後仍然可以家庭、事業並重，快啲生番個B。小琴未能夠去峇里出席婚禮，但都會祝佢哋婚姻美滿幸福。

報料電郵﹕piano@mingpao.com