新聞類別
財經
詳情#
【明報專訊】近排好多涉及富商嘅桃色新聞因為鬧上法庭而曝光，噚日又添一宗，但同富商XYZ遭情婦勒索唔同，呢單係上市公司前主席同前夫兼生意拍檔對簿公堂，主角就係發展度假村嘅實力建業（0519），兩位前董事王家琪同洪建生。
指控前夫 公數支付情婦使費
王家琪就話，懷疑前夫洪建生在任期間，濫用公司資源包養情婦，例如無端端請情婦做職員、發讀書津貼、找卡數不特止，仲幫埋情婦裝修屋企，捐錢去佢以前讀書間大學。王家琪話自己嘅股東權益受損，法官昨日亦都批准佢查呢位疑似情婦嘅出糧紀錄。
王家琪曾經係公司主席，上年3月雙方離婚後，佢改任非執行董事，而洪建生今年4月亦已辭咗董事總經理同埋執行董事職務，仲話同前妻引起幾宗官司，影響到公司運作而心感抱歉。王家琪上年入稟，話前夫濫用公司資金故要求查帳，包括2007至2008年公司一筆6300萬帳目唔見咗，支付情婦嘅費用、挪用公司於內地兩物業嘅989萬元人民幣租金等等。法官噚日如佢所願，下令公司要於14日內將2006年起公司嘅財務文件交出，包括疑似情婦嘅出糧詳情，畀王家琪翻查。
14日內須交出06年起財務文件
事件已經上咗法庭，電視劇都有教大家唔可以胡亂評論，否則有藐視法庭之嫌。不過小琴想講，上市公司高層安排情婦情夫入公司係常有嘅傳聞，睇嚟呢單官司喺金融界都可以「發人深省」。
報料電郵﹕piano@mingpao.com
留言 (0)
