新聞類別
財經
詳情#
【明報專訊】見到佐治古尼（George Clooney），讀者以為揭咗去娛樂版？非也。其實好多娛樂明星都有熱心公益嘅一面。咪住，熱心公益又關經濟版咩事？言歸正傳，事緣小琴剛收到一份有關里昂證券嘅新聞稿，話呢位集演員、製片、編劇及導演等身分於一身的荷李活巨星，將會成為該行9月中下旬喺香港舉辦嘅投資論壇做演講嘉賓喎。
據小琴了解，佐治古尼會喺9月21日中午現身灣仔君悅酒店，出席里昂投資論壇中嘅一場午餐會，不過佢呢次唔係用以上嘅身分露面，而係作為一個維權人士，同投資界分享荷李活以外嘅經歷。
以維權人士身分出席
咩話？維權人士？冇錯！其實佐治古尼除咗係荷李活巨星外，亦都係一位非常積極投身社會服務嘅人士。佢唔單止喺2008年已成為聯合國和平大使，更加喺舊年尾，同一班志同道合嘅人士合力搞咗個「Satellite Sentinel Project（衛星哨兵行動）」，監察北非國家蘇丹南北部嘅軍事衝突對平民嘅影響。今年初南蘇丹和平咁進行公投並獨立，據聞佢都有分推動，真係唔講唔知。
報料電郵﹕piano@mingpao.com
留言 (0)
