沈聯濤重出江湖 成立經濟智庫

【明報專訊】相信好多喺金融界打滾嘅人士，都聽過沈聯濤嘅大名，呢位香港證監會前主席家雖然貴為中國銀監會首席顧問，不過，工作性質都唔算正職，唔知係咪不甘寂寞，佢近排就喺利豐（0494）主席馮國經推動下，成立咗一個環球經濟研究中心，今日仲會見傳媒講吓個中心嘅發展，實行全面復出！

好多報界朋友都覺得沈聯濤外形相當學院派，事實上，呢位曾經喺金管局、證監、馬來西亞央行、國際證監會同世界銀行出任重要職位嘅猛人，喺2005年退休之後，返馬來西亞做大學教授，同埋清華大學經濟管理學院嘅兼職教授，後來雖然出任中銀監首席顧問，工作性質屬智囊，可以話啱晒文質彬彬嘅佢。

能夠令沈教授決定復出，Victor（馮國經洋名）肯定出咗唔少力，小琴都對呢個環球經濟研究中心充滿興趣，睇番沈教授之外嘅兩位主要人員，肖耿就係匯控（0005）非執董兼港大教授，Jean-Pierre Lehmann就係國際洛桑管理學院（IMD）國際政治經濟系教授兼國際政治及經濟評論組織Evian Group創辦人，來頭同樣唔小，唔怪得之可以吸引到沈教授出山啦。